БАА Терма Жамоаси хақида маълумот - 27 Января 2009

Тўғри, Миржалол Қосимов жамоасининг Қатарда ўтказиладиган навбатдаги қитъа биринчилигига чиқиши борасида хавотирланмасак ҳам бўлади. Зеро, саралаш раундида термамизга БААдан ташқари, яна қитъа миқёсида ҳам кучсиз ҳисобланадиган Малайзия термаси рақиблик қилади. Ҳиндистон термаси эса «Чақирув кубоги»даги муваффақияти ўлароқ, финал турнири йўлланмасини нақд қилган ва гуруҳ босқичидан озод этилган. Гуруҳдан икки жамоа Қатар йўлланмасини қўлга киритиши, 1-турда Малайзия термаси ўз майдонида БААга қарши баҳсда ҳеч нарса қилолмаганини инобатга олиб айтадиган бўлсак, йўлланмалардан бири айнан бизнинг жамоага насиб этиши хусусида шубҳаланмасак ҳам бўлаверади. Лекин гуруҳда етакчилик қилишга қайси жамоа муносиброқ, деган савол бор. Шунингдек, ҳар икки термани ЖЧ-2010 саралаш босқичида ўта муҳим ўйинлар кутиб турибди. Эртанги баҳс эса бир томондан, гуруҳда етакчиликка ким даъвогар эканлигини кўрсатиб берса, иккинчи томондан, бўлажак ўйинларга бевосита тайёргарлик вазифасини ўтайди. Қисқаси, ўйиннинг аҳамияти катта дейишга асослар етарли.

Амирликларга футбол ўтган асрда тижорат кемалари, яъни ишбилармонлар ва Британия армияси ёрдамида кириб борган. Бундан ташқари, мамлакатнинг футболга ошно тутинишида Ҳиндистоннинг ҳам таъсири бор. Негаки, ўша вақтда ҳиндлар диёрида футбол анча оммавий эди ва бу икки мамлакатнинг ўзаро алоқаси ҳам ёмон эмасди. 1971 йили БАА футбол ассоциациясига асос солинган. Кейинги йили ФИФА таркибига кирган ташкилот 1974 йилга келиб ОФК аъзосига айланган. 80-йиллардан бошлаб кўрфаздаги бу мўъжазгина, лекин бой мамлакат футболда ҳам илк ютуқларга эришади. Жумладан, 1986 йилдан 1988 йилгача мамлакат термаси «Форс кўрфази кубоги»да финалгача етиб боради. Муваффақиятнинг кульминацион нуқтаси шубҳасиз, 1990 йилга тўғри келади. Ўшанда БАА термаси Италияда ўтказилган мундиалга йўл олганди. Шунингдек, 4 йил олдин ҳам амирликлар ЖЧ остонасига келишганди. Фақат сўнгги ҳал қилувчи ўйинда Ироқ термасига ютқазиб қўйиб, Мексика-86 турнири йўлланмасини қўлдан бой беришади. Йирик мусобақаларни ўтказиш борасида БАА фантастик ташкилотчи мамлакат. Хусусан, мамлакатда 1996 йили Осиё кубоги ва 2003 йили ёшлар ўртасидаги ЖЧ турнирлари катта муваффақиятлар билан ташкил этилган. Ҳозирда миллий федерация ўз олдига юксак вазифаларни қўйган. Жумладан, амирликларни Осиё-2011 ва Олимпиада-2012 мусобақаларида иштирок этишларини таъминлашни. Лекин жамоанинг ЖЧ-2010 саралаш босқичидаги ишлари ҳозирча яхши эмас. Шундай бўлсада, араблар ҳали бу турнирдан ҳам умид узишмаган.

БАА термаси ЖЧ-2010 ҳал қилувчи саралаш босқичига анча кучли гуруҳдан йўл олди. Амирликлар 3-саралаш раундида Эрон, Қувайт ва Сурия термалари билан бир гуруҳда баҳс олиб боришди. Турнир якунида бўлажак рақибимиз 2-ўриндан жой олди. Жамоа 6 ўйинда 8 очко тўплаб, Сурияни тўплар нисбатига кўра, ортда қолдирди. Қизиғи, араблар гуруҳдаги сўнгги ўйинни ўз майдонларида ўтказиб, асосий рақиб Сурияга 1:3 ҳисобида имкониятни бой беришди. Шундай бўлсада, ке-йинги босқичнинг иккинчи йўлланмаси айнан уларга насиб этди. Эслатиб ўтамиз, гуруҳда 1-ўринни 12 очко тўплаган Эрон термаси банд этган. Ҳал қилувчи раундда эса БАА эски таниши Эрон ҳамда Саудия Арабистони, Жанубий Корея ва КХДР термалари даврасига тушди. Бироқ франциялик Брюно Метсю бошчилик қилган жамоа стартда термамиз каби омадсизликка учради. Ҳозирда жамоа тўрт ўйиндан сўнг атиги 1 очко олган ҳолда гуруҳда сўнгги ўринда бормоқда. Лекин янги мураббий Доминик Батанье охиригача таслим бўлмасликка ваъда бермоқда.

Енг кўп учрашув ўтказган футболчиси: Аднан Ал Таляни(164)

Биринчи халкаро учрашуви: Қатар – 1:0 (1992 йил 17 март, Саудия Арабистони)

Энг йирик ғалабаси: Бруней – 12:0(2001 йил 14 апрель, Бруней)

Энг йирик мағлубияти: Бразилия – 0:8 (2005 йил 12 ноябрь, Абу Даби)

Эришган ютуклари: Осиё вице-чемпиони(1996), жахон чемпионати иштирокчиси (1990),