Юртимиздаги футболчилар эндигина янги мавсум тараддудини бошлаётган бўлсалар, хориждаги баъзи легионер футболчиларимиз учун қиш мавсуми ҳам «қайноқ» давом этмоқда. Италия «С» серияси клублари 3 ҳафталик танаффусдан сўнг 2-давра учрашувларини бошлаган бўлсалар, Чехияда эса баҳорги давра учрашувлари 7 мартдан бошланади. Шаҳбоз Эркинов тўп сураётган Эрон Про-лигасида эса 19-турдан сўнг эълон қилинган 3 ҳафталик танаффусдан кейин яна чемпионат баҳслари давом эттирилди. Шаҳбознинг Эрондаги ишлари ёмон кетмаяпти. У Эронга борганидан буён барча учрашувларда майдонга тушмоқда. У “Пас” таркибидаги дастлабки учрашувидаёқ гол уришга муваффақ бўлганди. Яқинда Шаҳбоз “Барг”га қарши учрашувда жамоасининг яна бир голига муаллифлик қилди. Қизиқ томони, Эркинов қолган ўйинларда ҳам майдонда 90 дақиқа ҳаракат қилган бўлса-да, айнан у гол урган ўйинларда “Пас ғалаба қозонди. Биз юртимизда ҳукм сураётган қишки танаффусдан фойдаланиб, Эронда тўп сураётган ҳамюртимиз билан боғланишга ҳаракат қилдик ва у билан қисқача суҳбатлашишга муваффақ бўлдик.

– Шаҳбоз, «Пас» сафида илк учрашувингиздаёқ асосий таркибда майдонга тушиб, гол уришга муваффақ бўлдингиз ва бу учрашувда жамоангиз ғалаба қозонди. Қолган учрашувларда ҳам мунтазам равишда майдонда ҳаракат қилиб келаяпсиз. Демак, Эрон чемпионати ҳақида маълум тасаввурларга эга бўлдингиз. Дастлабки таассуротлар билан ўртоқлашсангиз.
– Эрон чемпионати бизнинг чемпионатга қараганда анча кучли экан. Бизда 2 та жамоа чемпионлик учун курашса, бу ерда 8-9 та клуб чемпион бўлиш учун курашади. Биринчи ўриндаги жамоа билан сўнгги поғонадаги клуб ўйнайдиган бўлса ҳам ўйиннинг натижасини олдиндан айтиб бўлмайди. Эрон футболи бизнинг футболга қараганда тезроқ. Бизда кўпроқ техник футбол намойиш қилинса, бу ерда эса жсмоний кучга асосланган атлетик футбол ўйналади. Ўйин суръати анча тез. Жамоага секин-секин мослашаяпман.

– Энг асосийси, ўйинингиз жамоа мураббийига маъқул келаяптими?
– Бу ҳақда бирор нарса дейиш қийин. Буни мураббийдан сўраш керак. Лекин ҳозирча ҳар бир учрашувда майдонга тушиб турибман.

– Тил муаммоси кийнамаяптими?
– Клуб менга таржимон ажратган. Таржимон хизматидан асосан раҳбарияти билан сўзлашганда фойдаланаман. Мураббийлар хорватлар, уларнинг тили рус тилига чқин, тушунса бўлади. Футболчилар билан эса футбол тилида гаплашамиз.

– Ўзи Эрон варианти, "Пас" клуби варианти қандай пайдо бўлди?
– Буни «Пахтакор» клуби раҳбариятидан сўраганингиз маъқул.

– Узоқ давом этган ўзимизнинг миллий чемпионатдан кейин, дам олмасдан, дарҳол Эрон чемпионатида ўйнаб кетиш қийин бўлмадими? Чарчоқ аломатлари сезилмаяптими?
– Йўқ. Чарчоқ аломатлари сезилмаяпти. Аста-секинлик билан бошладим ва чемпионат ўйин ўйинларига киришиб кетдим.

– Шу пайтгача бир нечта ўйинда майдонга тушдингиз. Қайси ўйинингиз ўзингизга кўпроқ ёқди?
– Кўп ўйинларда ютқазиб қўйган бўлсак-да, ҳамма ўйинларим ўзига яраша ёқди. Шуни билдим-ки, бу ерда кучсиз жамоанинг ўзи йўқ.

– "Пас"ни куч жиҳатдан биздаги қайси жамоага ўхшатиш мумкин?
– Буни ҳозирча таққослай олмайман.

– Эшитишимча, сиз билан Ихероуме Уче ҳам Эронга борган экан. Нима учун у Эронда қола олмади?
– Бу нотўғри маълумот. У мен билан Эрон келгани йўқ.

– Эрон чемпионатининг 19-тур ўйинлари 12-13 декабрь кунлари бўлиб ўтганди. 20-тур ўйинлари эса 29-30 декабрь кунлари бошланди. Нима учун 2 та турнинг орасида бунчалик узоқ танаффус бўлди? Ёки бу орада кубок ўйинлари ўтказилдими?
– Йўқ. Биринчи давра ўйинлари тугаб, яна 2 та тур ўйинлари ўтказилди ва шундан сўнг даврлар оралиғи учун бериладиган танаффус эълон қилинди. Шундай бўлсада, футболчилар дам олишмади. Деярли ҳар куни машғулотларда иштирок этдик.

– «Абу Муслим» билан ўйинда Эрондаги илк сариқ карточкангизни олдингиз. Ћакам нима учун сизга огоҳлантириш кўрсатди?
– Қўпол ўйнаганим учун.

– Хабарингиз бор, Ўзбекистон терма жамоаси бош мураббийи Миржалол Косимов 18-29 декабрь кунлари Исроилда ўқув-машғулот йиғинини ўтказди. Бу йиғинга таклиф қилинган футболчилар ичида сиз ҳам бор эдингиз. Лекин "Пас"да ўйнаётганингизни инобатга олиб, мураббийлар штаби сизни безовта қилишмади. Терма жамоа сафида ўз ўрнингизга эга бўлиш учун яхши имкониятни қўлдан чиқараётганиздан афсусда эмасмисиз?
– Менимча, бу тўғри йўл. Бу ерда чемпионат кетаяпти. Эронга яқинда келдим. Шунинг учун ҳам мураббийлар мени безовта қилишни хоҳлашмаган бўлишса керак. Имконият ҳақида гапирадиган бўлсам, ҳали яна имконият бўлар?! Яна ким билади...

– Осиёнинг энг яхши футболчиси дея ўзбекистонлик футболчи – Сервер Жепаровнинг тан олингани Эронда қандай кутиб олинди? Жепаров ҳақида сиздан сўрашдими?
– Яхши қабул қилишди. Ким у? Қаерда ўйнайди? Ёши нечада? Ростдан ҳам шунақа яхши ўйинчими? – каби саволлар билан мурожаат қилишди.