Азиз Xайдаров жамодошлари – Жасур Xасановнинг тезлигига Xавас kилса, Сервер Жепаровнинг ҳар бир ҳаракатларини олқишлар билан қарши олади.

Куни кеча “Туркистон” газетаси мухбирлари жамоамизнинг етакчи ярим ҳимоячиларидан бири – Азиз Ҳайдаровдан интервью олдилар. Қуйида ана шу суҳбатни қисқартирилган ҳолда келтириб ўтамиз.

— Яхши маънодаги, яъни рақиб жамоа ҳужумининг фаол «бузғунчи»си экансиз. Ҳаётда-чи?
— (Кулиб) Тўғри, фақат майдонда «бузғунчи»ман, холос. Уришқоқ эмасман, 2007 йилдаги сариқ карточкаларим сони «салмоқли» бўлганини тан оламан. 17-чемпионатда эса анча камайтиришга эришдим. Ҳаяжонни, таранглашган асабни жиловлаш кераклигини, бусиз футболда натижага эришиш мумкин эмаслигини тушундим.

— Ўзбек футболи сўнгги ўн йил ичида, айтиш мумкинки, сезиларли даражада ривожланди. Буни икнор этиб бўлмайди. Аммо баъзида ўйинчиларимиз рақиб дарвозасига тўп киритишни ёддан чиқариб қўядилар...
— Тўғри, дарвозани ишғол қилиш осонмас-да. Сиз қанча яхши тайёргарлик кўрсангиз, рақибингиз ҳам шундай тайёргарлик кўради. Яна бир муҳим жиҳат, қачонки, клублар иқтисодий томондан бақувват бўлса, футбол, албатта, ривожланади. Ҳар бир ўйинчи майдонда ўз рейтингини кўтаришга ҳаракат қилади. Ҳар бир ўйинчининг бундай ҳаракати жамоа рейтингининг кўтарилишига хизмат қилади. Алоҳида айтмоқчиманки, жамоамизнинг ташкил этилиши ўзбек футболига қаратилган жиддий эътиборнинг намунаси.

— Футбол бўйича 2006 йил жаҳон чемпионатида Франция ва Италия жамоаларининг финалдаги ўйинини футболчи сифатида қандай изоҳлайсиз?
— Замонавий футбол илгаригига нисбатан, мени назаримда анча узгарган - тезкор, қўпол, ютқазиш аламли. Ғалаба — унга қандай эришилишидан қатъий назар, тотли. Италия жамоаси менинг энг севимли жамоам. Эмоционал ўйин бўлган. Зиданни ҳурмат қиламан. Футбол фанатлари яхши билишади, жуда кучли, истеъдодли ўйинчи. Бундай иқтидор эгалари камдан-кам дунёга келади.

— Ҳозир ҳар бир соҳа вакили ўз касбидан ташқари спорт билан шуғулланади, яъни спорт севимли машғулотига айланган. Спортчининг ҳаётида бадиий адабиётнинг ёки илмнинг ўрни қай даражада муҳим?
— Жуда муҳим. Илмсиз инсон, ҳаётида бирорта китоб ўқимаган инсонни тасаввур қила олмайман, даҳшат-ку — бу. Худди «бошсиз чавандоз»дек тасаввур қилиш мумкин. Саид Аҳмаднинг «Киприкда қолган тонг» китобини оила аъзоларим ўқиётганига кўзим тушди. Тўғрисини айтаман, яширмайман, китоблар ўқигим келади, вақтим кам, жисмоний чарчоқдан кейин ҳеч нарсага кучингиз етмай қолади. Кам вақт сарфлаб, кўп маълумот олишга арзийдиган, энг муҳими анча қулай бўлган - кино фильмларни кўриб тураман.

- Футболчилардан кимларнинг ўйинини кузатасиз?
— Жасур Ҳасановнинг тезлигига ҳавас қиламан. Қолаверса, Сервер Жепаровнинг майдондаги ҳаракатлари таҳсинга лойиқ. Женнаро Гаттуза ва Хавьер Маскеранога ҳавас қиламан. Бу иккала ўйинчи нафақат ўз жамоасида, шунингдек бутун дунёга машҳур, такрорланмас тактикасига эга.