Аввал хабар бериб ўтганимиздек, Ўзбекистон миллий терма жамоасининг Туркияда ўтказилиши режалаштирилган ўқув-машғулот йиғини бекор қилинган бўлса-да, Миржалол Қосимов шогирдлари 21 январдан 2 февралгача жиддий шуғулланадиган бўлишди. 12 кун вақт оралиғида терма жамоамиз 4 марта майдонга тушади. 24 январь куни “Зенит, 28 январь куни БАА (Осиё кубоги-2011 саралаш), 1 февраль куни Озарбойжон билан бўладиган баҳслар ҳақида хабар бериб ўтдик. ЎФФ расмий сайти Терма жамоалар ва маркетинг бошқармаси бошлиғи Алишер Никимбаевнинг сўзларига таяниб тарқатган хабарига кўра, Ўзбекистон терма жамоаси 30 январь куни Чехиянинг “Славия” клуби билан назорат учрашувини ўтказади.
“Славия” Чехиянинг амалдаги чемпиони ҳисобланади ва клуб ҳозир ҳам чемпионатда 1-ўринда борган ҳолда, яқин таъқибчиси – “Болеслав”ни 6 очкога ортда қолдирмоқда. Чехияда 2-давра учрашувлари 21 февралда бошланади.
