Бошланажак мавсумда совринли ўринлар учун кураш олиб боришни режалаштираётган «Андижон» жамоаси Туркиядаги йиғинларда бир қатор футболчиларни кўрикдан ўтказишни бошлаб юборди. Аввалига Германия фуқароси бўлган Александр Франк билан жиддий қизиқиб қолган «Андижон» жамоаси куни кеча Роман Максимюк билан музокара олиб бормоқда.

 

1974 йилда таваллуд топган футболчи ярим ҳимоя ва ҳужум чизиғида тўп суради. Фаолиятини Киевнинг «Динамо» жамоаси бошлаган Роман 1998-1999 йилги мавсумда «Зенит» жамоаси сафида Россия Кубогини қўлга киритган, 2000 йили Киевнинг «Динамо»сига кайтиб, Украина чемпиони бўлган, 2001-2005-йиллар мобайнида «Днепр» жамоаси шарафини ҳимоя қилган Максимюк 2001 ва 2004 йиллари Украина чемпионати бронза медалларини қўлга киритган. 2005-2007 йиллари эса Луцкнинг «Волинь» жамоасида таркибида ўйнаган. 2008 йилда эса Қозогистоннинг «Атирау» жамоасида тўп сурган. Ҳозирда «Андижон» жамоаси Роман билан музокара олиб бормоқда. Мабодо, клуб ва футболчи молиявий келишиб қолгудек булса, «Андижон» жамоаси сафида янги футболчини учратиш мумкин.

Бундан ташқари, «Андижон» жамоаси Тунис ва Руминия терма жамоаси футболчилари билан музокара олиб бормоқда. Бироқ, бу футболчиларнинг исм-шарифлари сир тутилмоқда. Ким билади дейсиз, балки бу футболчилар бугун ўтказиладиган ўртоклик учрашувда майдонга тушишлари мумкин.