Бирлашган Араб Амирликларида 21 январдан 2 февралга қадар мавсумолди ўқув-йиғин машғулотларини олиб борган “қалдирғочлар”, 12 кунлик навбатдаги хориж йиғинини якунлашиб, 2 февраль куни гўзал пойтахтимизга қайтиб келдилар.

 

"Бунёдкор" аъзолари у ерда жами учта ўртоқлик учрашувида майдонга тушишди. Шуларнинг иккитасида ғалаба қозонилган бўлса, бир учрашувда дуранг натижа қайд этилди. Дастлаб, Болгариянинг “Литекс” клуби билан дуранг ўйналди – 0:0. Сўнгра Ривалдонинг ягона голи эвазига, УЕФА кубогида дадил одимлаётган, Украинанинг “Металлист” клуби доғда қолдирилди. Сўнгги, учинчи баҳс эса Чехиянинг энг номдор клуби бўлмиш – “Славия” билан бўлиб, унда жамоамиз аъзолари 2:1 ҳисобида устун келдилар. Ғалабани таъминловчи голларга Анвар Солиев ва Тимур Кападзелар муаллифлик қилишди.

 

Дарвоқе, Шаржа-Тошкент йўналишида парвоз қилган самолёт бортида “Бунёдкор” аъзоларидан ташқари, шунингдек, миллий терма жамоамиз вакиллари ҳамда Тошкентнинг бошқа бир клуби – “Локомотив” делегацияси ҳам жой олгандилар.

 

Вакилларимизни Тошкент халқаро аэропортида миллий терма жамоамиз фан-клуби аъзолари ҳам ажойиб тарзда кутиб олдилар.